Pasagdi ang abo sa Oslob

Makalagot ang pagkasunog sa Katolikong simbahan sa Oslob. Apan mas makalagot kung ang maong trahedya dili makahatag nato’g leksyon. Ang pagtukod og balik niini ibabaw mismo sa iyang abo dili tukmang paagi paghandum sa iyang kontribusyon sa kasaysayan ug kultura sa Oslob ug sa kinatibuk-ang simbahan. Tinuod, pag-alim kini sa mga samad sa kalag ug panumduman. Apan ang mga bato nga pabiling nagbarog, ang mga anoos nga nagpintal niini’g itom, sila ang mas buhing saksi sa atong kasaysayan ug sa pagkadanghag sa uban natong kaigsoonan.